ناسن تبي عرشن مثل عرش بلقيس

البارحـه ليلـي همـوم و كوابيـس
وأبعد من الجـوزا علـي الوناسـه
نفسي وأنا والليـل والهـم وابليـس
كـلٍ علـى الثانـي يبيلـه رياسـه
مدري ظروف الحب و لا هواجيـس
أو الثلاثـه كلهـن فـوق راســه
أو (ن) عقلي صايرن فيـه تنكيـس
وللعقل في بعض الأمـور انتكاسـه
يا لايمي لاتلومنـي قبـل ماتقيـس
اللـوم للمهمـوم يـزود قيـاسـه
والشر طبعـن للرجـال الهلابيـس
أهـل الهـدف والنمنمـه والبلاسـه
وأنا معي عقل ومشاعر واحاسيـس
وعيون وأخلاقن وقلـب وشراسـه
لكن حصلي من زمانـي عواكيـس
وعجزت تالي الوقت لعـرف لناسـه
هـذا يموهـا بهـرجـن تبالـيـس
وهذا يتجاهلهـا عنـاد و خساسـه
وهـذا يغـرك مظهـره بلملابيـس
وهذاك البس منـه شمـاغ ولباسـه
وهذا تذعذعلـه هبـوب النسانيـس
وهـذاك تقـل مغمغملـه بطـاسـه
وللناس بالدنيـا حظـوظ وقواميـس
اللي يغرف بـدرام واللـي بكاسـه
وليا حصلك مـن زمانـك تعاميـس
اصبر وللصبـر الجميـل انعكاسـه
ودرسك دنياك مـن غيـر تدريـس
ماهو لـزوم أنـك تـدرس دراسـه
وناسن على ناسن تجنـد جواسيـس
لجل الطمـع والسيطـره والنجاسـه
وناسن تهجس من غثا الوقت تهجيس
وناسن على ناسن تجيـد السياسـه
وناسن تبي عرشن مثل عرش بلقيس
وناسن تبي لو يوم فرقـا التعاسـه
والتيس مثل العنز كانه خفى التيـس
والتيس ماهو تيـس لـولا التياسـه